Қордай ауданында көктемнің шуақты мерекелерінің бірі – Көрісу күні ерекше атап өтілді. Бұл күні аудан тұрғындары, әсіресе этномәдени бірлестіктердің мүшелері мен ардагерлер кеңесінің өкілдері Қордай ауылындағы орталық саябақта бас қосып, жастарға дәстүрдің маңызын түсіндірді,-деп хабарлайды “Korday24news.kz” ақпараттық агентігі.
Көрісу күні – тек қол алысып, амандасу ғана емес, бұл – бірлікті, сыйластықты дәріптейтін, үлкенге құрмет, кішіге ізет көрсететін ұлы дәстүр. Шара барысында ақсақалдар мен этномәдени бірлестіктердің жетекшілері бұл дәстүрдің шығу тарихы мен оның ұрпақтар сабақтастығындағы маңызын баяндады.
Жиында сөз алған Қордай ауданының ардагерлер кеңесінің төрағасы Б.Әлімбет
«Көрісу – қазақ халқының сан ғасырдан бері жалғасып келе жатқан дәстүрі. Бұл күн адамдар арасындағы қарым-қатынасты нығайтып, достықты бекемдейді. Тек қазақ халқына ғана емес, Қазақстанда өмір сүріп жатқан барлық этнос өкілдеріне ортақ мереке. Жастарымыздың осы дәстүрді жалғастыруы – қоғамдағы татулықтың белгісі» – деп атап өтті.
Этномәдени бірлестік мүшелері де өз пікірлерімен бөлісіп, ел ішіндегі достық пен бейбітшілік, көпұлтты Қазақстан халқының ауызбіршілігі туралы ойларын жеткізді.
Шара соңында жастар ақсақалдардың батасын алып, бір-бірімен көрісіп, жылы лебіздерін білдірді.