Қордай аудандық орталық ауруханасының дәрігерлері 8 см көлемінде, салмағы 400 грамм болатын таспен науқасқа шұғыл хирургиялық көмек көрсетіп, оны небәрі 6 см кесу арқылы 20 минут ішінде алып тастады.
Қордай аудандық орталық ауруханасының хирургия бөлімінде сирек кездесетін клиникалық жағдай тіркелді: науқастың қуық қуысында алып тас анықталып, оған шұғыл ота жасалды.
Операцияны хирургия бөлімінің меңгерушісі Нұрлан Жақсыбаев пен уролог Әбіл Гусейнов жүргізді. Тәжірибелі анестезиологтардың қатысуымен хирургиялық араласудың оңтайлы әдісі – спиналдық анестезия таңдалды. Бұл әдіс науқастың ағзасына түсетін жүктемені азайтып, отадан кейін қалпына келу процесін жеңілдетуге мүмкіндік берді.
Хирургтер бар болғаны 6 см көлемінде тілік жасап, 20 минут ішінде қуықтағы тасты толығымен алып тастады. Мұндай тәсіл тіндердің зақымдануын барынша азайтып, науқастың тез сауығуына ықпал етеді.
Қазіргі таңда науқастың жағдайы тұрақты, ол дәрігерлердің бақылауында. Бұл жағдай аймақтағы медицинаның сирек кездесетін оқиғаларының бірі болып табылады және Қордай аудандық орталық ауруханасының мамандары күрделі медициналық жағдайларда да заманауи әдістерді тиімді қолдана алатынын көрсетеді.