Мемлекет басшысы Қасым-Жомарт Тоқаев отандық медицинаның дамуына үлес қосып, халық денсаулығын қорғау жолында еңбек етіп жүрген бір топ медицина қызметкерін мемлекеттік наградалармен марапаттады, — деп хабарлайды «Korday24news.kz» ақпараттық порталы.
Қазақстан Республикасы Президентінің Жарлығымен денсаулық сақтау саласындағы ұзақ жылғы еңбегі, кәсіби біліктілігі және азаматтардың өмірі мен денсаулығын сақтауға қосқан үлесі үшін бірқатар маманға жоғары мемлекеттік марапаттар берілді.
ІІ дәрежелі «Барыс» орденімен «А.Н. Сызғанов атындағы Ұлттық ғылыми хирургия орталығы» АҚ басқарма төрағасы Болатбек Баймаханов марапатталды.
«Парасат» орденіне Түркістан облыстық офтальмологиялық ауруханасының директоры Рамазан Бектұрғанов, Павлодар облыстық онкология диспансері бөлімше меңгерушісі Ульфат Боромбаев, Қазақ республикалық лепрозорийі Тасбөгет диспансерлік бөлімшесінің меңгерушісі Әбілмәжит Нысанов және Ұлттық нейрохирургия орталығының бөлім бастығы Айгүл Төлепбергенова ие болды.
Сонымен қатар медицина саласының көптеген өкілі «Құрмет» орденімен, «Ерен еңбегі үшін» және «Шапағат» медальдарымен марапатталды. Олардың қатарында дәрігерлер, ғалымдар, аурухана басшылары, мейіргерлер мен денсаулық сақтау саласының өзге де мамандары бар.
Мемлекеттік награда алғандар арасында еліміздің әр өңірінде еңбек етіп жүрген медицина қызметкерлері қамтылды.
Сондай-ақ бірқатар маманға «Қазақстанның еңбек сіңірген қайраткері» және «Қазақстанның еңбек сіңірген дәрігері» құрметті атақтары берілді.
Президенттің бұл шешімі медицина саласының дамуына үлес қосып жүрген мамандардың еңбегін бағалауға және олардың кәсіби қызметін қолдауға бағытталған.